سینیٹر اوباما اور  سینیٹر کلنٹن

امریکی صدر امیدوار ہلیری کلنٹن اور اوباما منگل کے روز ہوائی اور وسکانسن میں ڈیموکریٹک پارٹی کی نامزدگی کے مقابلوں کا سامنا کر رہے ہیں ۔

الی نوائے کے سینیٹر اوباما کو امید ہے کہ وہ آٹھ مسلسل مقابلوں میں کامیابی کے بعد نیو یارک کی سینیٹر پر اپنی بر تری برقراررکھیں گے ۔

رائے عامہ کے جائزوں سے ظاہر ہوتا ہے کہ وسکانسن میں مقابلہ سخت رہے گا جب کہ اوباما کو ہوائی میں یہ فائدہ حاصل ہے کہ وہ ان کی جائے پیدائش ہے۔

ری پبلکنز کے مقابلوں کی صورتحال یہ ہے کہ ایری زونا کے سنیٹر جان میک کین وسکانسن اور واشنگٹن اسٹیٹ میں ہونے والے مقابلوں میں اپنی بر تری برقرار رکھنے کی توقع رکھتے ہیں۔

انہیں پیر کے روز موجودہ صدر کے والد اور سابق صدر جارج ایچ ڈبلیو بش کی طرف سے زبر دست توثیق حاصل ہوئی ۔

واشنگٹن اسٹیٹ میں ڈیمو کریٹک پرائمری بھی منعقد ہو رہے ہیں لیکن نتائج مندوبین کی تقسیم کے انداز پر اثر انداز نہیں ہوں گے کیوں کہ اس کا تعینِ نو فروری کے کاکس میں ہو گیا تھا۔

پیر کے روز سینیٹر کلنٹن نے اوباما پر نکتہ چینی کرتے ہوئے کہا کہ انہوں نے ایک تقریر میں کسی اور کے جملے استعمال کرتے ہوئے اصل ماخذ کا حوالہ نہیں دیا۔