جان میک کین کی ری پبلکن پارٹی کی طرف سے نامزدگی تقریباً یقینی ہے

امریکی صدارتی امیدوار براک اوباما نے اپنی ڈیموکریٹک حریف ہلیری کلنٹن کے خلاف ہوائی اور وسکانسن کے پرائمری انتخابات جیت کر مسلسل دسویں فتح حاصل کر لی ہے۔

 دوسری جانب ری پبلکن پارٹی کی طرف سے صدارتی امیدوار جان میک کین بھی ریاست وسکانسن اور واشنگٹن سے فاتح قرار پائے۔ جان میک کین کا مقابلہ مائیک ہکابی کے ساتھ تھا، لیکن ہکابی ان سے بہت پیچھے ہیں اور میک کین کی نامزدگی تقریباً یقینی ہے۔

 سنیٹر ہلیری کلنٹن اور اوباما کے درمیان ابھی مقابلہ جاری ہے گو کہ پارٹی نامزدگی کے لئے سینیٹر اوباما کے پاس مندوبین کی تعداد بڑھتی جا رہی ہے۔

ریاست ٹیکسس میں اپنے حامیوں سے بات کرتے ہوئے سینیٹر اوباما نے دہرایا کہ وہ تبدیلی کے خواہاں ہیں اور میک کین ماضی کی غلط پالیسیوں کا پرچار کر رہے ہیں۔

 ادھر اوہائیو میں سینیٹر ہلیری کلنٹن نے اپنے خطاب میں کہا کہ وہ تجربہ کار ہیں اور صدارت کے لیے تیار بھی۔