براک اوباما اور ہلیری کلنٹن

امریکہ کی جنوبی ریاست مسی سیپی میں آج منگل کو ڈیموکریٹک پارٹی کی نامزدگی حاصل کرنے کے لیے سینیٹر اوباما اور سینیٹر ہلیری کلنٹن کے درمیان مقابلہ ہو رہا ہے۔ جائزوں کے مطابق یہاں براک اوباما کی فتح کے امکانات قوی ہیں۔

کل پیر کے دن مسی سیپی میں اپنی انتخابی مہم  کے دوران سینیٹر اوباما نے بطور نائب صدر انتخاب لڑنے کی تجویز کو ایک بار پھر مسترد کر دیا۔ جب کہ ہیلری کلنٹن نے کلنٹن ۔اوباما ٹکٹ کا بارہا حوالہ دیا۔ انہوں نے بطور صدر اوباما کے تجربے کے بارے میں بھی سوال اٹھایا کہ آیا ان کے پاس اس عہدے کے لیے معقول تجربہ ہے کہ نہیں؟  

اوباما کا کہنا ہے کہ ہلیری کلنٹن کے مقابلے میں ڈیموکریٹک مندوبین کی زیادہ تعداد ان کی حامی ہے۔ انہوں نے کہا کہ مجھے یہ بات سمجھ میں نہیں آرہی ہے کہ کس طرح دوسرے نمبر پر آنے والا ایک ایسے امیدوار کو نائب صدارت کی پیش کش کر رہا ہے جسے مقابلے میں سبقت حاصل ہے۔

ڈیمو کریٹک پارٹی سے تعلق رکلھنے والے دونوں امیدوار اب امریکہ ایک اور بڑی ریاست پینسلوینیا کی تیاری کر رہے ہیں، جہاں 22 اپریل کو پرائمری مقابلے ہوں گے۔

دوسری طرف ری پبلکن پارٹی کے جان میکین کی بطور صدارتی امیدوار نامزدگی یقینی ہے، انہیں اپنی نامزدگی کے لیے مطلوبہ مندوبین کی حمایت حاصل ہو چکی ہے۔