ورجینیا کے اس پرائمری اسکول میں انگریزی کے علاوہ فرانسیسی زبان پر بھی خصوصی توجہ دی جارہی ہے

امریکہ تارکین وطن کا ملک ہے جو زبان اور ثقافت کے رشتوں میں دنیا بھر کے ساتھ جڑے ہوئے ہیں۔دنیا کے گلوبل ولیج بننے سے دوسری زبانوں کی اہمیت بڑھتی جارہی ہے جس کے پیش نظر امریکہ کے کئی پبلک اسکولوں میں بچوں کو دوسری زبانوں میں مہارت پیدا کرنے اور ان کی معاشرت کے بارے میں شعور و آگاہی کے لیئے ایک خصوصی پروگرام شروع کیا گیا ہے۔

امریکی ریاست ورجینیا کے شہر میکلین میں واقع ایک پرائمری اسکول میں نو سو سے زیادہ بچے زیر تعلیم ہیں جو دوسری زبانوں کو سیکھنے کے پروگرام میں شامل ہیں۔ اس سکول میں فرانسیسی زبان پر خصوصی طور پر توجہ دی جارہی ہے۔

پانچویں جماعت کی فرانسیسی کی ٹیچر اینی ڈائر اس پروگرام کے بارے میں کہتی ہیں کہ یہ پروگرام ان بچوں کو سامنے رکھ کر بنایا گیا ہے جوفرانسیسی سیکھنا چاہتے ہیں۔ سکول کا آدھا دن فرانسیسی کے لیے وقف ہے۔ جس میں بچوں کو ریاضی اور سائنس فرانسیسی میں پڑھائی جاتی ہے۔ باقی آدھے وقت میں بچے انگریزی کی ٹیچر کے ساتھ گذارتے ہیں جہاں وہ معاشرتی علوم ، آرٹ اور انگریزی سیکھتے ہیں۔

اسکول کی پرنسپل رابن ہوکر کا کہنا ہے کہ ہمارا اسکول اس لحاظ سے ایک انٹرنیشنل سکول ہے کہ یہاں آنے والے بچوں کی مادری زبانیں مختلف ہیں۔ یہاں چار پانچ مختلف زبانوں سے تعلق رکھنے والے بچے داخل ہیں۔ چنانچہ یہ ہماری ذمہ داری ہے کہ ہم انہیں ایک عالمی معاشرے کے لیے تیار کریں جس میں یقیناً سب سے اہم کردار زبان کا ہے۔