پاکستانی صدر پرویز مشرف

صدرِ پاکستان پرویز مشرف نے طالب علموں سے کہا ہے کہ وہ سیاست سے الگ رہ کر تعلیم پر توجہ دیں اور اپنے اپنے شعبوں میں نام پیدا کریں۔

وہ ہفتے کو لاہور کے قریب کالا شاہ کاکو میں یونی ورسٹی آف انجنیرنگ اینڈ ٹیکنالوجی کے ایجوکیشن سٹی کیمپس کا سنگِ بنیاد رکھے جانے کی تقریب سےخطاب کررہےتھے۔

اُنہوں نےطالب عملوں سے کہا کہ کسی طور پر سیاست میں نہ پڑیں،کیونکہ اُن کے بقول، سیاست میں بہت سی چیزیں سچ کے طور پر پیش کی جاتی ہیں جو حقیقت میں سچ نہیں ہوتیں۔

صدر مشرف کا طلباسے خطاب ایسے وقت ہوا ہے جب ملک کے نئے وزیرِ اعظم یوسف رضا گیلانی نے اعتماد کا ووٹ لینے کے بعد اپنی جِن ترجیحات کا اعلان کیا اُن میں طلبا یونینوں پر پابندی ختم کرنے کا اعلان بھی شامل ہے جِس کا طلبہ تنظیمیں خیر مقدم کر رہی ہیں۔

لاہور میں اسلامی جمعیتِ طلبہ کےترجمان محمدعثمان نے اِس سلسلے میں وائس آف امریکہ کو بتایا کہ وزیرِ اعظم گیلانی نے اعلان کیا ہے کہ طلبا یونینوں پرسے پابندی ختم کی جائے گی۔ ’اب دیکھیں گے کہ وہ اِس کا کیا شڈول بنائیں گے، کس طرح تعلیمی اداروں میں انتخابات کروائیں گے۔‘

واضح رہے کہ طلبہ کو سیاست سے دور رکھنے کی غرض سے پاکستان کے طالب علموں کی یونینوں پر نو فروری 1984ءکو جنرل ضیا نے پابندی عائد کردی تھی جِس کے بعد 1989ء میں بے نظیر بھٹو نے اپنے پہلے دورِ حکومت میں چند ماہ کے لیے پنجاب میں طلبہ یونینوں پر پابندی ختم کرکے پھر عائد کردی تھی جو آج تک چلی آرہی تھی۔

اِس پابندی کے باوجود بھی طلبا نے مختلف ناموں سے اپنی تنظیمیں اور متحدہ محاذ بنا رکھے ہیں جو ممکنہ طور پر یونینوں کی شکل میں پھر سامنے آجائیں گے۔