چارلٹن ہیسٹن

شہر ہٴ آفاق امریکی اداکار چارلٹن ہیسٹن84 سال کی عمر میں انتقال کرگئے ہیں۔ان کی مشہور فلموں میں بین ہر، ٹین کمانڈمنٹس، پلانٹس آف دی اپیس اور تھری مسکٹیریرز شامل ہیں۔ انھوں نے بین ہر میں اپنے کردار پر آسکر ایوارڈ بھی جیتا تھا۔

ہیسٹن کے اہلِ خانہ نے ایک بیان میں کہا ہے کہ ان کا انتقال ہفتے کی رات لاس اینجلس میں اپنے گھر میں ہوا۔ انتقال کے وقت ان کی اہلیہ لیڈیا ان کے ساتھ تھیں۔ ہیسٹن نے 2002ءمیں انکشاف کیا تھا کہ وہ آ لزہائمر کے مرض میں مبتلا ہیں۔

یوں تو چارلٹن ہیسٹن نے اپنے طویل کیریر کے دوران درجنوں فلموں میں کام کیا لیکن انھیں سب سے زیادہ شہرت 1959ءمیں بن ہر میں ان کی لاجواب اداکاری کی وجہ سے حاصل ہوئی۔ انہوں نے دوسری مشہور اور کامیاب فلموں میں درجنوں افسانوی اور تاریخی کردار ادا کیے۔

ہیسٹن امریکہ میں ذاتی اسلحہ رکھنے کے زبردست حامی تھے اور انھوں نے امریکی لابی انگ تنظیم نیشنل رائفل ایسوسی ایشن کے صدر کے طور پر بھی نمایاں مقام حاصل کیا۔ وہ 1998ءمیں اس عہدے کے لیے منتخب ہوئے تھے اور پانچ سال تک اس پر فائز رہے۔