امریکی ریاست پنسلوانیا میں قائم کارنیگی میلن یونیورسٹی اپنے معیار تعلیم کے باعث دنیا بھر میں شہرت رکھتی ہے۔ اس یونیورسٹی میں بہت سے غیر ملکی طالب علم بھی زیر تعلیم ہیں جن میں ایشیائی ممالک سے تعلق رکھنے والے طلبہ بھی ہیں۔ یونیورسٹی میں پاکستانی طالب علموں کی تعداد نسبتاً کم ہے۔ مگر ان میں سے اکثر ایشیائی ممالک کے اسٹوڈنٹس کی تنظیم میں شامل ہیں۔

اس تنظیم نے حال ہی میں یونیورسٹی میں پاکستان کی ایک حقیقی تصویر دکھانے کے لیے ہفتہ پاکستان کا اہتما م کیا جس میں کئی پروگرام ترتیب دیے گئے۔ اس ہفتے کے پانچویں روز ایک خصوصی مذاکرے میں ایک پاکستانی طالب علم صفیان یوسفی نے پاکستان کے اپنے حالیہ دورے کے تجربات بیان کیے۔

صفیان یوسفی کارنیگی میلن یونیورسٹی سے گریجویشن کرنے کے بعد ایک تجارتی ادارے سے وابستہ ہوگئے ہیں۔ یونیورسٹی چھوڑنے کے بعد بھی وہ اس سے اپنا تعلق قائم رکھے ہوئے ہیں ۔ انہوں نے پاکستان میں زلزلہ سےمتاثرہ علاقوں کے لوگوں کی مدد کے لیے یونیورسٹی کے طالب علموں کے ساتھ مل کر کام کیا تھا۔

ہفتہ پاکستان کی تقریبات کے موقع پر صفیان یوسفی یونیورسٹی میں اپنے اہل خانہ کے ساتھ شریک ہوئے۔ وہ کچھ عرصہ قبل پاکستان گئے تھے، جہاں انہوں نے زندگی کے مختلف طبقوں سے تعلق رکھنے والے افراد سے ملاقاتیں کیں۔ وہ پاکستان کے اکثر علاقوں میں گئے۔ انہوں نے وہاں چند ریڈیو پروگرام بھی کیے۔ انہوں نے اپنی یادوں اور تجربات کو ایک خصوصی پروگرام میں تازہ کیا جس سے لوگوں کو پاکستان کی ایک حقیقی تصویر سے آگاہی ہوئی جو اس سےپہلے پاکستان کو صرف میڈیا پر پیش کی جانے والی دہشت گردی کی خبروں کے حوالے سے جانتے تھے۔