خوراک کی بڑھتی ہوئی عالمی قیمتیں باعث تشویش

جاپان اور یورپی یونین کے رہنماؤں نے خوراک کی بڑھتی ہوئی عالمی قیمتوں سے نمٹنےکے لیے ہنگامی اقدام کرنے کا مطالبہ کیا ہے۔

یہ معاملہ بدھ کے روز جاپانی وزیر اعظم یاسو فوکودا، یورپین کمیشن کے صدر ہوزے مینوئل براسو اور سلویینیا کے وزیر اعظم جانیز جانسا کے درمیان ٹوکیومیں ہونے والےایک روزہ سر براہی اجلاس کے ایجنڈے میں شامل متعدد موضوعات میں سے ایک تھا۔

جانسا یورپی یونین کے موجودہ صدر ہیں۔ راہنماؤں نے خوراک، تیل اور دوسری اشیائے صرف کی بڑھتی ہوئی قیمتوں پر اپنی سخت تشویش کا اظہار کیا۔

بیان میں کہا گیا کہ اس صورتحال سے عالمی معیشت کی افزائش میں کمی واقع ہو سکتی ہے اور غربت پر قابو پانے کے لیے ترقی پزیر ملکوں کی کوششوں پر منفی اثر پڑ سکتا ہے۔

مسٹر براسو نے یہ بھی کہا کہ ان سب کو گذشتہ سال بین الاقوامی ترقیاتی امداد میں نمایاں کمی پر دلی تشویش ہے۔

جاپانی اور یورپین لیڈروں نے ماحولیاتی تبدیلیوں سے نمٹنے کے لیے زیادہ ٹھوس اور پابند قسم کے عالمی معاہدے کا مطالبہ بھی کر رہے ہیں۔

ان کا کہنا ہے کہ ٹوکیو میں جولائی میں آٹھ بڑے صنعتی ملکوں کے گروپ کے سر براہی اجلاس میں 2009ءکے آخر تک معاہدے پر اتفاق رائے حاصل کرنے کے سلسلے میں صحیح معنوں میں خوش آئند پیش رفت کاموقع فراہم ہو رہا ہے۔

بین الاقوامی کمیونٹی ماحولیاتی تبدیلی سے نمٹنے کے لیے کسی ایسے معاہدے تک پہنچنے کی کوشش کر رہی ہے جو 1997ءکے کویوٹو پروٹوکول کی جگہ لے سکے جس کی مدت 2012ءمیں ختم ہو رہی ہے۔