برما میں طوفان کی مچائی ہوئی تباہی

برما کے عہدے داروں نے کہا ہے کہ ایک طاقت ور سمندری طوفان سے اروادی ڈیلٹا اور ملک کے سب سے اہم شہر رنگون میں 350 سے زیادہ افراد ہلاک ہوگئے ہیں۔

برما کی فوجی حکومت نے رنگون سمیت کئی وسطی اور جنوبی ریاستوں ینگون، اییاوادی، باگو، مون اور کرن کو اتوار کے روز تباہی سے متاثرہ علاقے قراردے دیا ہے۔

عہدے داروں نے کہا ہے کہ 190 کلومیٹر ہواؤں کے ساتھ آنے والے ’نرگس‘نامی سائیکلون نے رنگون اور اراوادی ڈیلٹا کے قصبے باسین کو شدید نقصان پہنچایا ہے۔

ٹیلی وژن کی فلموں میں بہت سی سرکاری اور نجی عمارتوں کو پہنچنے والا نقصان دکھایا گیا ہے جن میں عمارتوں کی اڑی ہوئی چھتیں، گرے ہوئے درخت اور ٹیلی فون کے کھمبے اور رکاوٹوں کےوجہ سے بند سڑکیں شامل ہیں۔

اس طاقت ور سمندری طوفان نے سرکاری ریڈیو، ٹیلی وژن، ٹیلی فون اور انٹرنیٹ کی سروس کو بھی متاثر کیا۔

ہمسایہ ملک تھائی لینڈ میں اقوامِ متحدہ کے عہدے داروں نے کہا ہے کہ مقامی اور بین الاقوامی امدادی کارکن نقصانات کا اندازہ لگانے کے لیے اتوار کے روز رنگون میں ملاقات کررہے ہیں۔