موگادیشو میں قیمتوں میں اضافے کے خلاف مظاہرے

صومالیہ میں عینی شاہدین نے کہا ہے کہ سیکیورٹی فوج نے دارلحکومت موگادیشو میں ایک ہجوم پر گولیاں چلائیں جو خوراک کی قیمتوں میں اضافے کے خلاف احتجاج کررہا تھا۔ اس واقعے میں کم ازکم ایک شخص ہلاک اور کئی دوسرے زخمی ہوگئے۔

پیر کے روز ہزاروں صومالی باشندوں نے موگا دیشو میں خوراک کی بڑھتی ہوئی قیمتوں کے خلاف کھانے پینے کی اشیا فروخت کرنے والے تاجروں پر پتھراؤ کیا اور بلوے کیے۔

مظاہرین پرانے کرنسی نوٹ قبول نہ کرنے پرتاجروں پر برہم تھے۔ان کرنسی نوٹوں کو صومالیہ میں آسمان کو چھوتے ہوئے افراطِ زر کا ذمے دار سمجھا جاتا ہے۔

مظاہرین کا کہنا تھا کہ انہیں عالمی سطح پر خوراک کی قیمتوں میں تیزی سے اضافے کی وجہ سے بہت نقصان پہنچا ہے۔

مظاہرین نے تاجروں کے خلاف نعرے لگائے، کاروں اور بسوں پر پتھراؤ کیا اور دکانوں کو جلانے کی دھمکیاں دیں۔

ایسوسی ایٹڈ پریس کی خبروں میں کہا گیا ہے کہ جنوبی موگادیشو میں سینکڑوں دکانوں اور ہوٹلوں کے دروازے لوٹ مار کے خوف سے بند کردیے گیے تھے۔