شعیب اختر بھارت پہنچ گئے ہیں جہاں وہ آئی پی ایل میں حصہ لیں گے

شعیب اختر کی طرف سے معذرت کے نتیجے میں متنازعہ فاسٹ باؤلر اور پاکستان سپورٹس بورڈ کے چیرمین ڈاکٹر نسیم اشرف کے درمیان مراسم دوبارہ استوار ہوگئے ہیں۔

صلح نامے کے محرک وفاقی مشیرِ داخلہ رحمٰن ملک بنے، جِنہوں نے دونوں اشخاص کے ساتھ  اپنے گھر پربات چیت کا موقع فراہم کیا۔

ذرائع نے بتایا ہے کہ یہ ملاقات اتوار اور پیر کی درمیانی شب پیپلز پارٹی کے شریک چیرمین آصف زرداری کی خواہش  پر عمل میں آئی۔ اِس موقعے پر ڈاکٹر نسیم اشرف اور شعیب اختر نے ایک دوسرے کے تمام شکوے شکایات درگزر کرنے کا اعلان کیا۔

بعد ازاں ابلاغِ عامہ سے بات چیت میں مشیرِ داخلہ نے کہا کہ کرکٹ کے شائقین کے لیے اِس حوالے سے آئے دِن کے سامنے آنے والے گلے شکوے کوئی خوش کُن بات نہیں تھی، اورضرورت اِس بات کی تھی کہ اِس معاملے کو خوش اسلوبی سے طے کیا جائے۔

رحمٰن ملک نے بتایا کہ شعیب اختر اور نسیم اشرف نے اُن کے ساتھ رات کا کھانا کھایا اور کھل کر گلے شکوے کیے۔ انھوں نے کہا کہ دونوں کے معاملات اپنے طور پر خوش اسلوبی سے طے ہو چکے ہیں اور امید ہے کہ آئندہ تلخیوں کا اعادہ نہیں ہوگا۔

وفاقی مشیرِ داخلہ نے کہا کہ شعیب اختر قومی ہیرو ہیں۔اُن کے الفاظ میں:’شعیب کو اللہ نے عزت دی ہے اور اُن کو ہیرو بنایا ہے۔ اُن کے لیے لازم ہے کہ وہ لوگوں سے دوستانہ رویہ رکھیں۔‘

ڈاکٹر نسیم اشرف نے میڈیا کو بتایا کہ اُن کے شعیب اختر کے ساتھ کوئی ذاتی معاملات نہیں تھے، اور معافی نامے کے نتیجے میں سب باتیں ختم ہو گئی ہیں اور اُن کے بقول اُن کے دل میں کوئی ایسی بات نہیں رہی۔

اُنہوں نے یہ بھی کہا کہ وہ شعیب اختر کے خلاف ہتکِ عزت کا دعویٰ واپس لے رہے ہیں۔