چین میں ایک مہلک وائرس کے پھوٹنے سے ہزاروں بچے آنتوں کے وائرس کا شکار ہوئے ہیں اوراس بیماری سے ہلاک ہونے والوں کی تعداد 32 تک پہنچ گئ ہے۔

حکام نے کہا ہے کہ جنوبی صوبے گوانگ ڈانگ میں ایک آٹھ ماہ کی بچی پیر کے روز ہلاک ہوگئی جبکہ اس کے قریبی صوبے گوانگ زی میں منگل کے روز اٹھارہ ماہ کا ایک بچہ چل بسا۔ وہ بیماری میں مبتلا ہونے کے تین روز بعد بے ہوشی کی حالت میں چلا گیاتھا۔

انٹرو وائرس 71 سے ہلاک ہونے والوں کی اکثریت کا تعلق مشرقی صوبے آن ہوئی سے ہے جہاں فویانگ شہر میں 22 بچے ہلاک ہوچکے ہیں۔

یہ وائرس ہاتھ، پاؤں اور منہ کی شدید بیماری کی صورت میں ظاہر ہوتا ہے جس کے بعد تیز بخارہو تا ہے اور مریض مفلوج ہوجاتا ہے۔

خبررساں ایجنسی زن ہوا نے بدھ کے روز کہا تھا کہ اس سال ہاتھوں، پیروں اور منہ کی بیماریوں میں لگ بھگ 20 ہزار افراد کے مبتلا ہونے کی اطلا ع ملی ہے۔

چین اور عالمی ادارہ صحت کا کہنا ہے کہ وائرس کی یہ قسم ماضی جیسی خطرناک نہیں ہے۔