میزوری میں بگولوں کے نتیجے میں نقصانات

جنوب وسطی ریاست میزوری اور اوکلا ہاما میں عہدے داروں نے کہا ہے کہ ہفتے کے روز اس علاقے پیدا ہونے والے بگولوں کے نتیجے میں کم ازکم 20 افراد ہلاک ہوگئے ہیں۔

میزوری کے جنوب مغرب میں بگولوں سے کم ازکم 12 افراد ہلاک ہوئے۔ مرنے والوں میں سے دس افراد کاتعلق نیوٹن کاؤنٹی سے تھا۔ یہ کاؤنٹی اوکلاہاما کی سرحد کے قریب واقع ہے۔

اوکلاہاما میں ہلاک ہونے والے تمام 7 افراد کاتعلق قصبے پیچر سے ہے جو ریاست کے شمالی مشرقی حصے میں واقع ہے۔ ہنگامی انتظامات کے عہدے داروں کا کہنا ہے کہ ٹارنیڈو سے قصبے کے ایک بڑے حصے کو نقصان پہنچا ہے۔

اسپتال کے عہدے داروں نے کہا ہے کہ میزوری میں تقریباً 90 زخمیوں کا علاج کیا گیا ہے جبکہ اوکلاہاما میں 50 زخمی اسپتال لائے گئے تھے۔ ہنگامی کارکن طوفان کا نشانہ بننے والے افراد کو نکالنے کے لیے تباہ شدہ گھروں کا معائنہ کررہے ہیں۔