اسرائیل نے کہا ہے کہ وہ پیر کے روزیروشلم میں غزہ کی پٹی میں حماس کےساتھ معاہدے کی تجویز لے کر آنے والے مصری ثالث کی میزبانی کرے گا۔

نائب وزیر دفاع میٹن ولنائی نے اتوار کے روز اسرائیلی ریڈیو کو بتایا کہ ان کی حکومت مصری انٹیلی جنس کے سربراہ عمر سلیمان کی جانب سے پیش کی جانے والی جنگ بندی کی تجویر پر غور کرے گی۔

دوسری طرف اسرائیلی وزیر اعظم ایہود اولمرٹ نے اتوار کے روز کہا ہے حماس غزہ سے داغے جانے والے تمام راکٹوں اور مارٹر گولوں کی ذمہ دار ہے اور انہوں نے انتباہ کیا کہ اگر یہ حملے بند نہ ہوئے تو وہ بزور قوت انہیں خاموش کرادیں گے۔

ایک اور خبر میں کہا گیا ہے کہ حماس کے عسکری شعبے نے کہا ہے کہ ان کا ایک جنگجو غزہ اسرائیل سرحد کے ساتھ ایک دھماکے میں ہلاک ہوگیا ہے۔ عسکریت پسند اس وقت ہلاک ہوا جب اسرائیل پر حملے سے قبل ہی بم پھٹ گیا۔