ترک فوج

ترکی نے کہا ہے کہ اس کی فوج نے رات کے وقت شمالی عراق میں کرد باغیوں کے ٹھکانوں توپ خانے اور طیاروں سے شدید حملے کیے ہیں۔

ترک فوج نے اتوار کے روز کہا کہ اس کے جنگی طیاروں نے کردستان ورکرز پارٹی یا پی کے کے کے عسکریت پسندوں کو نشانہ بنایا اور انہیں عراقی سرحد کے پار ایک علاقے میں پسپا کردیا۔

فوج نے کہا کہ، پی ۔کے۔ کے کے عسکریت پسندوں نے جمعے کے روز حکاری میں ترک فوج کی ایک تنصیب پر حملہ کیا تھا جس میں دو ترک فوجی ہلاک ہوگئے تھے۔

پی کے کے ، کے حملے کے جواب میں ترک فوج کی جانب سے دوسری بار فضائی حملے کیے گئے ہیں۔

ترک فوج کے عہدے داروں نے کہا ہے کہ ان کے فوجیوں نے عراق اور ایران سرحد پر واقع حکاری صوبے میں باغیوں کے ایک مضبوط گڑھ پرہفتے کی صبح فضائی حملوں میں 19 کرد باغیوں کو ہلاک کردیا ۔فوج نے کہا ہے کہ باغیوں کا پیچھا کرتے ہوئے اس کے چار فوجی بھی ہلاک ہوئے ۔