پاکستانی دفترِ خارجہ

دفترِ خارجہ کی طرف سے جاری کردہ بیان کے مطابق پاکستان نے دولتِ مشترکہ میں اپنی رکنیت کی بحالی کا خیر مقدم کرتے ہوئے کہا ہے کہ وہ اِس تنظیم کے مقاصد کو آگے بڑھانے میں مؤثر کردار ادا کرے گا۔

دولتِ مشترکہ نے گذشتہ سال تنظیم سے پاکستان کی رکنیت اُسی وقت معطل کردی تھی جب صدر مشرف نے تین نومبر کو ملک میں ایمرجنسی نافذ کرتے ہوئے آئین کو معطل کر دیا تھا۔

گذشتہ ماہ تنظیم کی جانب سے اِس بات کا عندیہ دیا گیا تھا کہ اب جب کہ پاکستان میں ایک منتخب حکومت اقتدار میں آچکی ہے اور صدر مشرف بھی فوج کے سربراہ کا عہدہ چھوڑ چکے ہیں تو پاکستان کو تنظیم میں دوبارہ شامل کیا جا سکتا ہے۔

پیر کے روز لندن میں دولتِ مشترکہ کے ورکنگ ایکشن گروپ نے ایک نیوز کانفرنس میں پاکستان کی رکنیت بحال کرنے کا اعلان کیا۔