روس کے وزیر اعظم ولادی میر پوٹن

روس کے وزیر اعظم ولادی میر پوٹن نے صدر دیمتری مدوی دیف کو اپنے مجوزہ وزراء کی فہرست پیش کی ہے جس میں انہوں نے اپنے چند اہم صدراتی ساتھیوں کو بھی شامل کیا ہے اور کئی اہم وزراء کو تبدیل نہیں کیا گیا۔

وزیر اعظم پوٹن نے اپنے کئی قریبی ساتھیوں کو اپنے ساتھ رکھا ہے جن میں وزیر خارجہ سرگئی لاروف شامل ہیں۔ انہوں نے وزیر دفاع انتولی سردئی خوف اور وزیر خزانہ الیکسی کدرن کو ان کے منصب پر برقرار رکھا ہے۔ انہوں نے 8 مزید وزراء بھی شامل کیے جن میں ایک کھیل اور سیاحت اور دوسرا ماحولیات کا وزیر بھی شامل ہے۔

روس کے خبر رساں ادارے اتارطاس نےصدر مدوی دیف کے حوالے سے بتایا ہے کہ پیر کے روز نئی کابینہ کی منظوری ہوسکتی ہے ۔ انہوں نے کہا کہ گذشتہ دو ماہ سے وزیر اعظم پوٹن اور دوسروں کے ساتھ وزراء کے معاملے پر کام کررہے ہیں۔

صدرمدی دیف اور ان کے سرپرست پوٹن نے کہا ہے کہ وہ روس پر باہمی اشتراک کے ساتھ حکومت کریں گے لیکن بہت سے تجزیہ کاروں کا کہناہے کہ وہ سمجھتے ہیں کہ وزیر اعظم پوٹن اصل اختیارات بدستور اپنے پاس رکھیں گے۔

وزیر اعظم پوٹن کی فہرست کے مطابق توانائی اور صنعت کی وزرات دو حصوں میں تقسیم ہوگئی ہے۔ سرگئی شمت توانائی کے نئے وزیر ہوں گے جبکہ وکٹر کرسٹن کو صنعت کی وزارت دی گئی ہے ۔