ایران اور بین الاقوامی ایٹمی ایجنسی کے درمیان ایران کے متنازع ایٹمی پروگرام کے بارے میں مذاکرات کا ایک دور شروع ہو گیا۔

ایران کی سرکاری خبر رساں ایجنسی ارنا نے خبر دی ہے کہ انٹر نیشنل اٹامک انرجی یا IAEA کے وفد اور IAEA میں ایرنی سفیر علی اصغر سلطانی کے درمیان آج پیر کے روز تہران میں تین روزہ مذاکرات شروع ہو گئے ہیں۔

پچھلے ماہ IAEA کے اعلی تفتیش کار اولی ہینانن اور ایران کے سفیر کے درمیان مذاکرات کے دو دور ہو چکے ہیں۔ ایٹمی ایجنسی کا کہنا ہے کہ وہ ایران پر عائد ان تمام الزامات کی تحقیق کرنا چاہتی ہے ، جن کے مطابق ایران اپنی ایٹمی ٹیکنالوجی کو ہتھیار بنانے کے لیے استعمال کر سکتا ہے۔

دوسری طرف ایران کا کہنا ہے ان مذاکرات کا مقصد ایران اور IAEA کے درمیان تعاون کو فروغ دینا ہے۔

 امریکہ اور اس کے مغربی اتحادیوں کا کہنا ہے ایران ایٹمی ہتھیار بنانے کے لیے کام کر رہا ہے، جبکہ ایران کا کہنا ہے کہ اس کا ایٹمی پروگرام پُر امن مقاصد کے لیے ہے۔