ہیلی کاپٹروں سے پھینکا جانے والے امدادی سامان کو متاثرین سمیٹ رہے ہیں

چینی فوج سی چوان صوبے کے دور افتادہ دیہات میں ہیلی کاپٹروں سے خوراک کا سامان پھینک رہی ہے تاہم ان ہزاروں افراد کی جانیں بچانے کے لئے وقت بہت کم رہ گیا ہے جو منہدم سکولوں ، گھروں اور دوسری عمارتوں کے ملبے میں دبے ہوئے ہیں۔

چین کے سرکاری اعداد و شمار کے مطابق بدھ کے روز ہلاک ہونے والوں کی تعداد 15 ہزار تک پہنچ چکی ہے۔اب جبکہ امدادی کارکن ان علاقوں میں پہنچ کر کھدائی شروع کر رہے ہیں جہاں سب سے زیادہ نقصان ہوا ہے، عہدیداروں کو اندیشہ ہے کہ مرنے والوں کی تعداد میں اضافہ ہوجائیگا، اگرچہ کچھ لوگوں کو زندہ نکال لیا گیا ہے۔

حکام کا کہنا ہے کہ مزید 40ہزار افراد یا تو ملبے تلے دبے ہوئے ہیں یا لا پتہ ہیں۔چین کی سرکاری خبر رساں ایجنسی زِن ہُوا کا کہنا ہے کہ سات فوجی ہیلی کاپٹروں نے وین چوان کاؤنٹی اور متعدد ملحقہ کاؤنٹیوں میں امدادی سامان پہنچایا ہے۔