روس نے عالمی طاقتوں پر زور دیا ہے کہ وہ تہران کے جوہری پروگرام سے متعلق تنازعے کے حل میں مدد کے لیے ایران کو سیکیورٹی کی ضمانتیں دیں۔

روسی خبررساں اداروں نے وزیر خارجہ سرگے لیَوروف کے بدھ کے ایک بیان کے حوالےسے کہا ہے کہ عالمی طاقتوں کو یہ یقین دہانی بھی کرانی چاہیے کہ تہران مشرق وسطیٰ مذاکرات میں ایک بہتر کردار ادا کرے۔

لیَوروف نے کہا کہ انہیں یقین ہے کہ یہ مشرق وسطیٰ میں کشیدگی کم کرنے اور ایرانی جوہری صورت حال کے حل کے سلسلے میں ایک مؤثر طریقہ ہے۔روسی خبررساں اداروں نے کہا کہ لیَوروف نے ان خیالات کا اظہارجرمن وزیر خارجہ فرینک والٹر سٹائن مائر کےساتھ روسی شہر یکاترین برگ میں ملاقات کے بعد کیے تھے۔

تاہم امریکہ نے کہا ہے کہ ایسی ضمانتوں کے بارے کچھ زیرِ غور نہیں ہے۔ صدر جارج بش کے ایک ترجمان نے، جو صدر کے ہمراہ اسرائیل کے دورے پر ہیں، وی او اے سے گفتگو کرتے ہوئے کہا کہ ایران کے لئے اپنی سلامتی کو یقینی بنانے کا بہترین طریقہ یہ ہے کہ وہ اسرائیل کو صفحہء ہستی سے مٹانے کی دھمکیاں دینا چھوڑ دے اور عراق، افغانستان اور لبنان کو غیر مستحکم کرنے کی کوششیں ختم کر دے۔