ملبے کے نیچے دبے ہوئے لوگوں کی تلاش جاری

چین میں زلزلے سے متاثرہ صوبے سی چوان میں مرنے والوں کی تعداد میں مسلسل اضافہ ہورہا ہے اور ہزاروں افراد ابھی تک ملبے میں دبے ہوئے ہیں۔ بدھ کے روز ملبے سے ایک حاملہ عورت کو زلزلے کے دو روز بعد بحفاظت زندہ نکال لیا گیا۔

عورت کو جو آٹھ ماہ کی حاملہ تھی ایک منہدم اپارٹمنٹ بلڈنگ کے ملبے سے نکال کر فوری طورپر اسپتال پہنچایا گیا۔

خبررساں ادارے رائیٹر کو عورت کے ایک رشتے دار نے بتایا کہ اس کا خاندان بہت خوش ہے لیکن اس نے ان لوگوں کے بارے میں تشویش کا اظہار کیا جوابھی تک ملبے تلے دبے ہوئے ہیں اور مدد کے لیے پکار رہے ہیں۔

سرکاری خبررساں ادارے زن ہوا نے بتایا ہے کہ ایک تین سالہ بچی کو بھی بچالیا گیا جو چالیس گھٹنے سے زیادہ وقت تک اپنے والدین کے جسموں کے نیچے دبی رہی تھی۔

ہانگ کانگ نے امدادی کام میں مدد کے لیے پچاس ہزار سے زیادہ فوجی اور46 ملین ڈالر کی امداد بھیج دی ہے اور بین الاقوامی براداری بھی چین کو امداد بھیج رہی ہے۔

انٹرنیشنل ا ولمپک کمیٹی نے دس لاکھ ڈالر کی امدادی رقم ، کمبل اور خیمے دینے کا وعدہ کیا ہے۔