بالی وڈ کی مشہور اداکارہ مادھوری ڈکشت ایک بار پھر فلمی دنیا سے کنارہ کشی اختیار کر رہی ہیں۔ مادھوری کے بزنس مینیجر راکیش ناتھ کے مطابق اس ہفتے کے آخر تک مادھوری امریکہ واپس چلی جایئں گی۔

واضح رہے کی گزشتہ سال یش راج بینر کی فلم ’آجا نچلے’ سے مادھوری نے فلمی دنیا میں واپسی کی تھی۔قیاس آرائیاں یہ بھی کی جارہی ہیں فلموں کو عارضی طور پر الوداع کہنے کی وجہ اُن کی فلم آجا نچلے کا فلاپ ہونا ہے۔

پدماشری ایوارڈ کو لینے کے لیےمادھوری اپنے شوہر سرجن ڈاکٹر رام کے ساتھ بھارت آئی ہوئیں ہیں۔ بھارت کی صدر پرتیبھا پاٹل کے ہاتھوں دارلحکومت دلی میں مادھوری نے پدماشری ایوارڈ حاصل کیا۔

مادھوری کی فلم ’آجا نچلے ’بھلے ہی فلاپ ہوگئی ہو تاہم 50 سے زائد فلموں میں اپنی بے مثال اداکاری کے جوہر دکھانے والی مادھوری کا شمار اب بھی بالی وڈ کی چوٹی کی اداکاراؤں میں کیا جاتا ہے۔ اسی لیے یہ افواہ کافی سرگرم تھی کہ یش چوپڑہ اپنی اگلی فلم میں مادھوری کو سائن کرنے کے خواہش مند ھیں۔

تاہم راکیش ناتھ نے صحافیوں سے اِس بات کی تردید کرتے ہوئے کہا ہے کہ مادھوری بہت جلد امریکہ واپس لوٹ رہی ھیں اور اسی لیے انھوں نے کوئی نئی فلم سائن نہیں کی ہے۔

یہ پہلی بار نہیں جب با لی وڈ کی کسی ہیروئن نےشادی کے بعد عارضی طور پر فلموں کو الوداع کہا ہے۔ سری دیوی ہو یا سونالی بیندرے ، روینہ ٹنڈن ہو یا کاجول ہندی فلموں کی تمام چوٹی کی اداکاراؤں نے شادی کے بعد ازواجی زندگی کو سنوارنے کے لیےاپنے فلمی کئیریر کو الوداع کہا۔

مادھوری اپنے بھارتی نژاد کے امریکہ میں مقیم شوہر کے ساتھ فلوریڈا میں رہتی ھیں۔اُن کے دو بیٹے بھی ہیں۔