پاکستانی فاسٹ باؤلر شعیب اختر

با لی وڈ کے معروف اداکار شاہ رخ خان کی کولکتہ ٹیم نائٹ رائڈرز نے منگل کے روز انڈین پریمیئر لیگ کے ایک کرکٹ میچ میں دلی کے ڈئیرڈیویلس کو 23 رنز سے شکست دے دی۔

کرکٹ کے شائقین کے لیے  تو خیر ایک باسی خبر ہے مگر شو بز کے حوالے سے یہ ایک یاد گار دن تھا۔

انڈین پریمیئر لیگ نے کرکٹ اور فلمی دنیا کو آپس میں جوڑ دیا ہے۔ پہلے تو یہ ہوا کرتا تھا کہ کرکٹ کا کوئی بھولا بھٹکا کھلاڑی فلمی دنیا کا رخ کرلیا کرتا تھا مگر اب تو فلمی دنیا خود چل کر کرکٹ گراؤنڈ میں آگئی ہے۔ ایک طرف تماشائیوں کے پیولین میں بھارتی فلمی ستارے ہیں تو دوسری طرف میدان میں کرکٹ کے سٹار۔۔ عام تماشائی حیران ہیں کہ وہ کس کس طرف دیکھیں۔   

یوں تو نائٹ رائڈرز کے ہر میچ کے دوران کنگ خان یعنی  شاہ رخ کی اسٹیڈیم میں موجودگی کرکٹ کے کھیل پر حاوی رہتی ہے ۔ ذرائع ابلاغ نے تو اُنہیں نائٹ رائڈرز ٹیم کا بارہواں کھلاڑی بھی بنا دیا ہے۔ تاہم  منگل کے روز ’آئی پی ایل’ میں اپنا پہلا میچ کھیلتے ہوئے پاکستانی فاسٹ باؤلر شعیب اختر نے اپنی جارحانہ بولنگ سے کرکٹ شائقین کا دل جیت لیا۔ اختر کی ہرگیند پراسے بے تحاشہ داد و تحسین ملی ۔

واضح رہے کہ گزشتہ دنوں ڈسپلن کی خلاف ورزی کرنے پر شعیب اختر پر پاکستان کرکٹ بورڈ نے پانچ سال کی پابندی عائد کی ہے ۔ تاہم پاکستانی بورڈ نےانہیں عبوری طور پر تک

 آئ پی ایل کے میچوں میں کھیلنے کی اجازت دے دی۔

کولکتہ میں کھیلے گئے میچ میں ’راولپنڈی ایکسپریس ’شعیب کی ایک جھلک دیکھنے کے لیے لاکھوں کرکٹ کے شیدائی اکٹھا ہوئے تھے۔ شعیب نے بھی اپنے مداحوں کو مایوس نہیں کیا اور منگل کے روز کھیلے گئے میچ میں اپنے جوہر کا خوب مظاہرہ کیا کرتے  گیارہ رنز کے عوض میں 4 وکٹ لیے۔

منگل کے روز پہلی چار وکٹیں شاہ رخ کے دوست شعیب اختر کی جھولی میں آئیں۔ شعیب کی کامیابی سے کولکتہ ٹیم کے مالک شاہ رخ خوشی سے پھولے نہیں سما رہے تھے۔  اور وہ منظر دیدنی تھا جب شعیب اختر کو مین آف دی میچ کا انعام دیا گیا، ایسا لگا جیسے یہ انعام شاہ رخ خان کو ملا ہو۔

 آخر میں جب شعیب اختر کو  مین آف دی میچ کا ایوارڈ ملا تو شاہ رخ  جذبات سے مغلوب شعیب اختر کی گود میں چڑھ گئے۔ آئی پی ایل میں کھیلے گئے 9 میچوں میں کولکتہ کی یہ پانچوی فتح تھی۔

ایک طرف شاہ رخ خان منگل کے روز کولکتہ کی ٹیم کو ملی جیت کی خوشی میں پھولے نہیں سما رہے تھے تو دوسری طرف اُن کی ٹیم کے پانچ کھلاڑی جنہوں نے کولکتہ ٹیم سے کھیلنے کا معاہدہ سائن کیا تھا وہ کافی اُداس ہے۔ کولکتہ ٹیم کے کوچ جان بوچانن نے یہ فیصلہ لیا ہے کی جن کھلاڑیوں نے آئی پی ایل کا ایک بھی میچ نہیں کھیلا ہے اُنہیں گھر واپس بھیج دیا جائیگا۔