آج منگل کو موٹر وے پر شیخوپورہ کے قریب اپنی نوعیت کے ایسے پہلے حادثے میں دو درجن کے قریب گاڑیاں، جن میں بسیں اور ٹرک بھی شامل تھے، قریبی کھیتوں میں دھوئیں کے باعث آپس میں ٹکرا گئیں۔اس کے نتیجے میں گورنر پنجاب خالد مقبول کی ہمشیرہ آپا نسیم اور بہنوئی شیخ اعجاز سمیت کم از کم چھ افراد کے ہلاک اور پندرہ کے زخمی ہونے کی تصدیق پولیس حکام نے کی ہے۔

موٹر وے پولیس کے ایک عہدیدار کا کہنا ہے کہ شیخوپورہ انٹر چینج کے قریب کھیت میں فصل کی کٹائی کے بعدلگنے والی آگ تیز ہوا کی وجہ سے موٹر وے کے ارد گرد گھاس پھونس کو بھی لگ گئی جس سے ہر طرف دھواں پھیل گیا۔

ایک عینی شاہد نے جسکی گاڑی تباہ ہوگئی لیکن وہ خود محفوظ رہا،اس دھوئیں کے بارے میں بتایا کہ وہ اتنا گاڑھا تھا کہ ایک فٹ سامنے بھی کچھ دکھائی نہیں دیتا تھا۔