بھارت کے بدامنی کے شکار شمال مشرق میں دو مختلف حملوں میں علیحدگی پسند باغیوں نے 11 افراد کو ہلاک کردیا۔

جمعرات کے روزریاست آسام میں ہونے والے ایک حملے میں ، پولیس نے کہا ہے کہ عسکریت پسندوں نےسیمنٹ کے چار ٹرکوں پر گھات لگا کر حملہ کیا اور 10 افراد کو گولیاں مار کر ہلاک کردیا۔

آسام میں ہی ایک اور واقعہ میں باغیوں نے ایک مسافر گاڑی پر گولیاں چلائیں جس سے ایک کنڈیکٹر ہلاک اور تین افراد زخمی ہوگئے۔

دونوں حملے آسام کے دارلحکومت گوہاٹی سے 300 کلومیٹر دور ہوئے۔

پولیس کو شبہ ہے کہ یہ حملے علیحدگی پسند گروپ دیما ہالام دواگا نے کیے ہیں۔ یہ گروپ ایک اپنے ایک آزاد وطن کے لیے لڑ رہا ہے۔ ا س گروپ کا کہنا ہے کہ قومی حکومت آسام کے قدرتی وسائل کا استحصال کررہی ہے اور یہاں کے مقامی باشندوں کے مفاد کے لیے بہت کم کام کرتی ہے۔

پولیس نے اس گروپ پر یہ الزام لگایا ہے کہ اس نے اتوار کے روز آسام میں ریلولے کے کم ازکم 9 کارکنوں کو ہلاک کردیا تھا۔