عرب ثالثوں نے لبنان میں ہفتے بھر سے جاری خونریز فرقہ وارانہ فسادات سے پیدا شدہ بحران کو روکنے کی غرض سے ایک معاہدے کو حتمی شکل دے دی ہے۔ عرب وفد کے سربراہ، قطر کے وزیر ِ اعظم، حمد بن جاسم الثانی نے جمعرات کے روز بیروت میں ایک نیوزکانفرنس میں اس معاہدے کا اعلان کیا۔انہوں نے بتایا کہ متحارب لبنانی دھڑے، صدر کے انتخاب اور ایک قومی یکجہتی حکومت قائم کرنے کیلئے مذاکرات دوبارہ شروع کرنے پر راضی ہو گئے ہیں۔ انہوں نے کہا وہ بات چیت دوبارہ شروع کرنے کے لئے جمعے کے روزقطر میں ملاقات پر رضامند ہیں۔

اِس وفد نے حزب اللہ اور لبنانی حکومت سے مذاکرات کرنے کے بعد ایک معاہدہ تیار کیا تھا جسکا مقصد فریقین کے مابین کئی روز سے جاری لڑائی کو ختم کرانا تھا۔

درایں اثنا حزبِ مخالف کے حامیوں نے بیروت کے ہوائی اڈے کو جانے والی سڑکوں سے رکاوٹیں دور کرنا شروع کر دی ہیں تاکہ کمرشل پروازوں کو معمو ل پر لایا جاسکے۔ حزب اللہ نے ان سڑکوں کی ناکہ بندی کر رکھی تھی۔