سچ کی تلاش میں جان قربان کرنے والے  صحافیوں کی  ایک یادگار واشنگٹن ڈی سی میں قائم کی گئی ہے جو اس شہر  کے سب سے جدید نیوز میوزیم  کا حصہ ہے۔ نیوزیم کے سینئیر ایڈیٹر ڈان راس کے مطابق  خطرے   سے جان بچا کر بھاگنا ایک  فطری  رد عمل ہے مگر گوشت پوست کے انسانوں میں چند کردار ایسے بھی ہوتے ہیں جو خطرے سے دور نہیں بلکہ خطرے کی طرف بھاگتے ہیں۔ یہ  تین طرح کے لوگ ہوتے ہیں ، پولیس مین ،فائر مین اور جرنلسٹ۔ جرنلسٹ میموریل کی دیوار  پر ان ایک ہزار آٹھ سو تینتالیس صحافیوں کے نام درج ہیں  جنہوں نے  صحافتی اصولوں کو قربان کرنے کے بجائے اپنی جان قربان کرنا مناسب سمجھا۔ یہاں موجود  تصویریں  صحافت کے پیشے کی حقیقی قیمت ادا کرنے والے انہی صحافیوں  کی  ہیں۔ جو اس بات کا ثبوت  ہیںکہ میڈیا کی ترقی نے سچ کا سفر تیز تر اور صحافیوں کے لئے خطرات میں  اضافہ کر دیا ہے۔

ڈان راس کہتے ہیں کہ اس جنگ کا پچھلی جنگوں سے فرق یہ ہے کہ اب صحافیوں کو خاص طور پر ٹارگٹ کیا جا رہا ہےکیونکہ مختلف عناصر نہیں چاہتے کہ سٹوری باہر نکلے۔ ورلڈ وار ٹو اور ویت نام جنگ کے زمانے میں کوئی صحافیوں کی جان کا دشمن نہیں بن گیا تھا مگر اب ایسا کیا جا رہا ہے تاکہ ان کی زبان بند کی جائے۔

میموریل کی دیوار پر نام درج کرانے کی شرط بڑی سخت ہے۔ ڈان راس کہتے ہیں کہ اگر آپ صحافی ہوتے ہوئے ہارٹ اٹیک یا ٹرک کی ٹکر سے مرنے کا سوچ رہے ہیں تو میموریل کی دیوار پرآپ کے لئے کوئی جگہ نہیں۔ اس دیوار پر نام درج کرانے کے لئے صحافی کی موت اپنے پیشہ ورانہ فرائض کی انجام دہی کے دوران ہونی ضروری ہے۔ مگر اس میموریل پر اپنی عقیدت کا خراج پیش کرنے والوں کی رائے کچھ ملی جلی سی ہے۔ جبکہ صحافیوں کو غیر ضروری خطرات سے بچنے کی تلقین کرنے والوں کی بھی کمی نہیں۔

دو ہزار کے لگ بھگ صحافیوں کی اس یادگار میں پاکستانیوں کا حصہ کتنا ہے ؟کیا پاکستانی صحافی زیادہ خطرناک صورتحال میں کام کر رہے ہیں ؟

ڈان راس کہتے ہیں کہ پاکستان میں1965 کے بعد سے اب تک 29 صحافی مارے گئے ہیں۔ ان میں زیادہ تر پاکستانی صحافی تھے اور شاید ایک دو پاکستانی نہیں تھے۔ ۔ لیکن صحافیوں کو درپیش خطرات کے حوالے سے ڈان راس کا کہنا ہے کہ پاکستان ایسا ملک نہیں ہے جہاں پرمیں رپورٹنگ کرنا چاہوں گا۔ 1994 میں پاکستان میں دو صحافی مارے گئے تھے۔ 2000 میں ایک ، 2002 میں دو اور2007 میں چھ پاکستانی صحافی مارے گئے۔ یہ تعداد مسلسل بڑھ رہی ہے۔ اس سال کے دوران بھی کچھ پاکستانی صحافی مارے جا چکے ہیں اور ڈان راس کا کہنا ہے کہ جو ریکارڈ ہمارے پاس ہے اس سے پتہ چلتا ہے کہ وہ اس سال کے آخری صحافی نہیں ہونگے۔

میموریل کی دیوار پرجہاں 2007 میں شمالی وزیرستان میں قتل ہونے والے پاکستانی صحافی حیات اللہ خان سمیت کئی ایشیائی صحافیوں کی تصاویر دیکھی جا سکتی ہیں۔ وہاں پاکستانی نیوز چینل اے آر وائے کے کیمرہ مین محمد عارف ،روزنامہ مرکز کے جاوید خان ،فری لانس فوٹوگرافر محبوب خان ،روزنامہ پاکستان کے نور حکیم خان،روزنامہ اسلام کے مسعود محمود ،روزنامہ جنگ کے زبیر احمد مجاہد اورچشتی مجاہد کے نام بھی واشنگٹن ڈی سی کے اس جرنلزم میموریل پردرج ہو چکے ہیں۔