انسانی حقوق کی تنطیموں نے بیجنگ میں اولمپک مقابلوں کی افتتاحی تقریب میں صدر بش کی شرکت کے فیصلے پر مایوسی کااظہار کیا ہے۔

امریکی اراکینِ پار لیمنٹ اور حقوقِ انسانی کے کارکنوں نے صدر بش سے کہا تھا کہ انسانی حقوق کے بارے میں چین کے خراب ریکارڈ اور سوڈان کے سلسلے میں اس کی پالیسیوں کی روشنی میں وہ چین میں منعقد ہونے والے اولمپک مقابلوں کی افتتاحی تقریب میں شرکت نہ کریں۔

کل جمعرات کو وائٹ ہاؤس کی ترجمان خاتون نے اس بات کی تصدیق کی تھی کہ صدر بش اور خاتونِ اوّل اولمپک کی افتتاحی تقریب میں شرکت کریں گی۔

ترجمان نے یہ بھی کہا کہ صدر بش اس موقعے پر چینی رہنماؤں سے بھی ملاقات کریں اور انسانی حقوق کے معامالات پر ان سے بات چیت کریں گے۔

واضح رہے کہ برطانیہ اور جرمنی کے سربراہوں نے اس تقریب میں شرکت کرنے سے انکار کر دیا ہے ، جبکہ فرانس کے صدر سار کوزی نے اپنا فیصلہ یہ کہہ کر موخر کر دیا ہے کہ اس کا انحصار چین اور تبّت کے جلا وطن رہنما دلائی لاما کے نمائندوں کے درمیان جاری مذاکرات کے نتائج  پر ہوگا۔