ایتھوپیا نے کہا ہے کہ اس کی فوج نے صومالیہ میں صومالی حکومت کے ساتھ ایک مشترکہ کارروائی میں 71 اسلام پسند جنگجوؤں اور ان کے لیڈروں کو ہلاک کردیا ہے۔

سرکاری خبررساں ادارے نے جمعے کے روز کہا کہ یہ مشترکہ کارروائی ،بقول ان کے مٹبان اور گورائل کے علاقوں میں ایک طئے شدہ دہشت گرد حملے کو روکنے کے لیے 29 جون کو شروع کی گئی تھی۔

اطلاعات میں کہا گیا ہے کہ ہلاک ہونے والوں میں صومالیہ کی اسلام کورٹس یونین یا عسکریت پسند تنظیم شباب کے 13 لیڈر شامل ہیں۔ ان کا کہنا ہے کہ ہلاک ہونے والوں میں ایک کینیڈا کا کرنل بھی ہے جس کا نام بین الاقوامی دہشت گردوں کی فہرست میں شامل ہے۔

خبررساں ادارےرائیٹرز نے اسلام پسندوں کے ایک ترجمان شیخ عبدی رحیم عیسیٰ اڈو کے حوالے سے بتایا ہے کہ اس نے کہا ہے کہاکہ ان جھڑپوں میں صرف 7 جنگجو ہلاک اور9 زخمی ہوئے ہیں۔ ترجمان نے اپنی صفوں میں کینیڈا کے کسی کرنل کی موجودگی کی بھی تردید کی ہے۔

ایتھوپیا کے فوجی دوسال قبل صومالیہ کی عبوری حکومت کواسلامی تحریک کے خلاف لڑائی میں مدد کے لیے صومالیہ میں داخل ہوئے تھےجس کا ملک پر قبضہ کرنے کا خطرہ تھا۔