صدر بش نے کہا ہے کہ وہ بیجنگ اولمپکس کی افتتاحی تقریب میں شامل ہوں گے کیوں کہ ایسا نہ کرنے سے چینی عوام  ناراض  ہوسکتے ہیں اور اس سے چین کے ساتھ تعلقات  بہتر بنانے میں مزید مشکل پیش آسکتی ہے۔

انہوں نے کہا کہ اگرچہ  چین کو اپنے انسانی حقوق کے ریکارڈ کو ضرور بہتر بنانا چاہئیے مگر انہیں اپنے تحفظات پر آواز اٹھانے کے لیے اولمپکس کو بہانے کے طور پر استعمال کرنے کی ضرورت نہیں ہے۔

صدر بش نے، جو اتوار کے روز اپنی 62 ویں سالگرہ منارہے ہیں، جاپانی وزیر اعظم یاسو فوکودا کے ساتھ ایک اخباری کانفرنس میں نامہ نگاروں سے بات چیت کر رہے تھے۔

جاپانی وزیرِ اعظم نے   کہاکہ سیاست کو کھیلوں سے نتھی نہیں کرنا چاہئیے۔ انھوں نے اعلان کیا کہ وہ  بھی اولمپکس کی افتتاحی تقریبات میں شریک ہوں گے۔

انسانی حقوق کے سرگرم کارکن اور امریکہ کے بعض قانون ساز صدر بش پر اولمپکس کی افتتاحی تقریبات کے بائیکاٹ پر زور دے رہے ہیں۔ کئی عالمی راہنماؤں نے جن میں جرمن چانسلر آنگلا میئرخیل شامل ہیں، کہاہے کہ وہ بیجنگ اولمپکس میں شرکت نہیں کریں گی۔