وزیر اعظم یوسف رضا گیلانی

وزیر اعظم یوسف رضا گیلانی نے کابل میں بھارت کے سفارت خانے پر ہونے والے خود کش دھماکے کی مذمت کرتے ہوئے کہا ہے کہ اس میں پاکستان کا کوئی جاسوسی ادارہ ملوث نہیں۔

وزیر اعظم نے یہ بیان ملائیشیا میں دیا جہاں وہ ان دنوں ترقی پزیر ممالک کے سربراہی اجلاس ڈی ایٹ میں شرکت کر رہے ہیں۔ یوسف رضا گیلانی نے کہا کہ پاکستان اپنے ہمسائے ملک افغانستان میں افراتفری کیوں کر پھیلائے گا جب کہ خود ان کے ملک کو انتہا پسندی اور دہشت گردی کا سامنا ہے۔

سوموار کو افغان وزارت داخلہ کے ایک اعلی اہلکار نے براہ راست پاکستان کے جاسوس ادارے آئی ایس آئی کا نام لیے بغیر کہا تھا کہ کابل میں بھارت کے سفارت خانے پر حملے میں خطے کے کسی ملک کا جاسوس ادارہ ملوث ہو سکتا ہے۔

پاکستانی وزیر اعظم کا کہنا تھا کہ ان کا ملک خطے میں استحکام کا خواہاں ہے اور مستحکم افغانستان ہی پاکستان کے مفاد میں ہے۔ انہوں نے القائدہ اور طالبان کا نام لیے بغیر کہا کہ اس حملے میں وہ لوگ ملوث ہوسکتے ہیں جو خطے اور عالمی ا من کے لیے ایک خطرہ ہیں۔

گزشتہ روز وزیر خارجہ شاہ محمود قریشی نے دھماکے کی بھرپور مذمت کرتے ہوئے کہاتھا کہ پاکستان ہر قسم کی دہشت گردی کی مذمت کرتا ہے۔

سوموار کو کابل میں واقع بھارت کے سفارت خانے میں ہونے والے خودکش حملے میں چالیس سے زائد افراد ہلاک ہوگئے تھے اور دھماکے بعد امریکہ، اقوام متحدہ کی سیکورٹی کونسل اور انگلستان کی جانب سے مذمت کی گئی تھی۔

اس سال اپریل میں افغان صدر حامد کرزئی پر ہونے والے قاتلانہ حملے کے بعد بھی پاکستان کے جاسوس ادارے آئی ایس آئی کو براہ راست نشانہ بنایا گیا تھا، تاہم پاکستان نے نہ صرف افغان حکام کی جانب سے لگائے جانے والے الزامات کو ہمیشہ رد کیا ہے بلکہ گزشتہ ہفتے دفتر خارجہ کے ترجمان نے کہا کہ افغان حکومت میں بعض ایسے عہدے دار ہیں جو بغیر تحقیق کے پاکستان پر ایسے الزامات عائدکرتے رہتے ہیں۔