بنگلہ دیشی بچے امدادی خوارک کے تھیلے لے کر جا رہے ہیں

بالی وڈ میں ایسے کئی اداکار ہیں جو  سماج کے فلاح و بہبود کے لیے کام کرتے ہیں۔ سماجی خدمات کی بات کریں توشبانہ اعظمی کے بعد اگر کسی فلمی ستارے کانام ذہن میں آتا ہے تو وہ ہیں راہول بوس۔

راہول بوس پریشان ہیں کہ حالیہ غذائی بحران کی وجہ سے دنیا کے تقریباً دس کروڑ لوگ بھوک سے متاثر ہورہے ہیں۔ اسی لیے انھوں نے ہالی وڈ کے فلمی ستاروں کے ساتھ مل کر ترقی یافتہ ممالک کی تنظیم  جی ایٹ  کے سیاسی رہنماؤں کو درخواست بھیجی ہے کی وہ عالمی سطح پر پھیلی غذائی قلت کو قابو میں کرنے کے لیے ہنگامی قدم اٹھائیں ۔

واضح رہے کہ ٹوکیو شہر میں جی ایٹ  ممالک کا اہم اجلاس پیر کے روز سے شروع ہوگیا ہے۔

یہ پہلی بار نہیں جب راہول سماجی کاموں میں دلچسپی دکھا رہے ہیں ۔ وہ ممبئی اور بھارت کی کئی غیرسر کاری تنظیموں سے وابستہ ہیں ۔ اپنی فلموں سے ذیادہ راہول سماجی کاموں کی بدولت اخباروں کی سرخیوں میں بنے رہتے ہیں ۔ پھر چاہے وہ سونامی سے متاثرہ لوگوں کو دوبارہ بسانے کی بات ہو یا پھر ممبئی اور گجرات کے فساد متاثرہ لوگوں کے حق کی لڑائی ، راہول بوس نے ہمیشہ مظلوم اور پسماندہ لوگوں کے حق کے لیے آواز اٹھائی ہے۔