امریکی وزیر خارجہ کانڈولیزارائس

امریکی وزیر خارجہ کانڈولیزارائس نے کہا ہے کہ جارجیا کے خلاف روس کے طرزِ عمل سے کشیدگی میں اضافہ ہورہاہے۔

منگل کے روز وزیرِ خارجہ رائس نے پراگ میں کہا کہ سابق سویت جمہوریہ جارجیا اب ایک آزاد ریاست ہے. انہوں نے روس اور جارجیا دونوں سے اشتعال انگیز اقدامات سے اجتناب کرنے کی اپیل کی۔

امریکی عہدے دار نے کہا کہ وہ  روس کی جانب سے ان سلسلے وار اقدامات سے مایوس ہوئے ہیں جو اس نے الگ ہوجانے والے علاقوں ابخازیہ اور جنوبی اوسیٹیا کے لیے کیے ہیں۔

اسی اثنا میں جنوبی اوسیٹیا کے عہدے داروں نے الگ ہوجانے والے علاقے کی انتظامی سرحد کے قریب جارجیا کے چار ملازمین کی حراست کا  اعلان کیا ہے۔

دونوں علاقوں نے1990ءکے عشرے کے شروع میں جارجیا سے آزادی کا اعلان کیا تھا جس کے نتیجے میں لڑائی شروع ہوگئی اور روسی امن کاروں کو علاقے میں بھیجا گیا۔

جارجیا نے اس عزم کا اظہار کیا ہے کہ وہ ان علاقوں کو دوبارہ مرکزی حکومت کے کنٹرول میں واپس لائے گا۔

کانڈولیزارائس امریکی میزائل دفاعی نظام کی تنصیب کے معاہدے پر دستخط کے لیے جمہوریہ چیک میں ہیں۔