احمد فرازکی بدوستور انتہائی نگہداشت میں

احمد فراز شکاگو کے ہسپتال میں شدید نگہداشت کے شعبے میں زیرِ علاج ہیں اور ان کے طبی معالج مرتضیٰ ارائیں کے مطابق ان کی حالت میں بہتری کے آثار آ رہے ہیں۔

اس سے پہلے پاکستان ٹیلی ویژن، پریس ٹرسٹ آف انڈیا اور کئی دوسرے اخباری اداروں نے احمد فراز کے وفات کی خبر نشر کی تھی۔

شکاگو کی معروف ادبی شخصیت افتخار نسیم نے وائس آف امریکہ سے بات کرتے ہوئے کہا کہ ان کی وفات کی خبر غلط طور پر نشر کی گئی اور وہ حیات ہیں، تاہم وہ بدستور انتہائی نگہداشت کے شعبے میں ہیں۔

انھوں نے کہا کہ احمد فراز گر گئے تھے جس سے ان کے گھٹنے میں شدید چوٹ آئی تھی۔ اس کے بعد ان کے گھٹنے کا آپریشن بھی ہوا ہے، لیکن گھٹنے میں شدید تکلیف برقرار ہے جس کی وجہ سے ڈاکٹروں نے انھیں درد کش ادویات دی ہیں جن کی وجہ سے وہ غنودگی کی حالت میں ہیں۔

اسی دوران ان کے گردوں میں خرابی کا پتا چلا، جس کے بعدگردوں کا ڈایالسس کیا گیا،جس کے بعد ان کی طبیعت مزید بگڑ گئی۔

افتخار نسیم نےبتایا کہ احمد فراز کے صاحب زادے شبلی فراز امریکہ پہنچ گئے ہیں اور ہسپتال میں احمد فراز کے ساتھ ہیں۔

احمد فراز مشاعروں میں شرکت کرنے کے لیے امریکہ اور کینیڈا کے دورے پر ہیں۔