کوسوو کے صدرفاتمیر سجدیو اور وزیر اعظم ہاشم تھاسی  جمعے کے روز واشنگٹن میں امریکی وزیر خارجہ کانڈولیزا رائس سے ملاقات کررہے ہیں۔

کوسوو کے یہ دونوں راہنما فروری میں سربیا سے آزادی کے اعلان کے بعداپنے پہلے دورے پر جمعرات کو واشنگٹن پہنچے۔

وزارتِ خارجہ میں اپنی ملاقات کے بعد  صدر اور وزیر اعظم امریکی وزیرِ دفاع رابرٹ گیٹس کے ساتھ مذاکرات کے لیے پنٹا گان جائیں گے، جب کہ صدر سجدیو اور وزیر اعظم ہاشم پیر کے روز وائٹ ہاؤس میں صدر بش سے ملاقات کریں گے۔

وائٹ ہاؤس نے کہا ہے کہ اس دورے سے بش انتظامیہ کو کوسوو کو جمہوری، خوش حال اور کثیر النسلی ملک بنانے کی کوششوں کے لیے بھرپورامریکی حمایت کے بارے میں گفت و شنید کا موقع ملے گا۔

40 سے زیادہ ممالک نے کوسوو کی آزادی کو تسلیم کرلیا ہے تاہم سربیا اس کی شدید مخالفت کرتا ہے۔