جنوبی افریقہ کے سابق صدر نیلسن منڈیلا نےاپنی 90 ویں سالگرہ کے موقع پر ملک کے متمول طبقے سے کہاہے وہ اُن لوگوں کی مدد کریں جو ان جیسے خوش قسمت نہیں ہیں۔

جمعے کے روز جنوبی افریقہ میں اپنے دیہی گھر میں نامہ نگاروں سے گفتگو کرتے ہوئے نیلسن منڈیلا نے کہا کہ دیہاتوں اور شہروں، دونوں جگہ غربت نے لوگوں کو اپنی گرفت میں لے رکھا ہے۔انہوں نے کہا کہ وہ لوگ جو امیر ہیں، اُن کی مدد کریں جو غربت کا مقابلہ نہیں کر سکتے۔

نوبیل انعام یافتہ منڈیلا نے کہا کہ وہ خوش قسمت ہیں جو 90 سال کی عمر کو پہنچے ہیں مگر انہوں نے کہا کہ غریب افراد عام طور پر اس عمر تک نہیں پہنچ پاتے۔

اپنے ماضی کا ذکر کرتے ہوئے نیلسن منڈیلا نے کہا کہ اُن کی خواہش تھی کہ وہ اپنے اہل خانہ کےساتھ زیادہ وقت گذار سکتے مگر انہوں نے کہا کہ انہیں اس پر تاسف نہیں ہے۔

نیلسن منڈیلا نے  ملک کی سابق سفیدفام اقلیتی حکومت کے خلاف جدوجہد کے دوران اپنی زندگی کے تقریباً 30 سال جیل میں گذارے تھے۔