امریکی وزیر خارجہ کانڈولیزارائس

امریکی وزیر خارجہ کانڈولیزارائس نے  شمالی کوریا پر زور دیا ہے کہ وہ اپنی جوہری سرگرمیوں کے اعلان کی تصدیق کے عمل کی شرائط کو تسلیم کرے۔

کانڈولیزارائس نے جمعرات کے روز سنگاپور میں اخبار نویسوں کو بتایا کہ شمالی کوریا نے گذشتہ ماہ  پلوٹونیم کی  تیاری پر بہت  تشنہ رپورٹ دی تھی اور اس سلسلے میں اب بھی بہت کچھ جواب طلب ہے۔انہوں نے کہ اگر عالمی سطح پر منظور شدہ ذرائع کے ذریعے شمالی کوریا کے منصوبوں کی  تصدیق نہیں کی جاسکتی تو کوئی بھی شمالی کوریا کے بیانات پر یقین نہیں کرے گا۔

شمالی کوریا کے ایک ترجمان ری تنگ اِل نے کہا ہے کہ اگر امریکہ اپنے وعدوں کو پورا کرے تو جوہری منصوبوں کی تصدیق سمیت تمام مسائل حل ہو جائیں گے۔امریکہ نے کہا تھا کہ  اگر شمالی کوریا  اپنے جوہری منصوبوں سے باز آجائے تو نہ صرف  اسے دہشت گرد ممالک کی فہرست سے خارج کر دیا جائیگا بلکہ اسے خوراک اور ایندھن بھی فراہم کیا جائے گا۔

امریکی وزیرِ خارجہ نے اپنے شمالی کوریائی ہم منصب پاک اُوئی چُن سے پہلی بار بدھ کے روز ملاقات کی۔