افغان صدر حامد کرزئی

امریکی وزارت خارجہ کے ایک سابق عہدے دار ٹامس شویچ نے الزام  لگایا ہے کہ افغانستان میں منشیات کی تجارت کو ملک کے اعلیٰ عہدے دار تحفظ فراہم کررہے ہیں۔

تھامس شویچ  نے  نیویارک ٹائمز کی ویب سائٹ پر جمعرات کے روز شائع ہونے والے ایک مضمون میں لکھا  ہے کہ افغان صدر حامد کرزئی نے افغانستان سے پوست کی فصل کو ختم کرنے کی امریکی کوششوں کو متعدد بار نقصان پہنچایا ہے۔

شویچ افغانستان میں انسداد منشیات اور عدالتی اصلاحات کے معاون کے طور کام کررہے تھے۔ انھوں نے  پچھلے مہینے اپنا عہدہ چھوڑ دیا تھا۔

انہوں نے الزام لگایا ہے کہ نہ صرف  طالبان عسکریت پسند اپنی شورش کو  پوست کی تجارت کے ذریعے سرمایہ فراہم کررہے ہیں، بلکہ  صدر کرزئی اور ان کے حامیوں نے بھی منشیات کی تجارت کو امیر بننے کے لیے استعمال کیا ہے۔

انہوں نے لکھا ہے کہ افغان صدرمنشیات کی تجارت کواپنی سیاسی مضبوطی  کے لیے استعمال کررہے ہیں تاکہ وہ2009ءمیں دوبارہ صدر منتخب ہونے میں کامیاب ہوسکیں۔

کسی امریکی یا افغان عہدے دار نےفوری طور پرا س پر کوئی تبصرہ نہیں کیا۔اقوامِ متحدہ اور امریکہ کے مطابق افغان کاشت کار دنیا کی 93 فی صد پوست پیدا کرتے ہیں۔