اطالوی کوہ پیما اپنے ساتھی کی قبر پر

شمالی پاکستان میں نانگا پربت پر تقریباً ایک ہفتہ زندگی اور موت کی کشمکش میں مبتلا رہنے والے  دو اطالوی کوہ پیماوٴں کا کہنا ہے کہ موت کے خوف نے ان کے نانگا پربت سر کرنے کے شوق کو کمزور نہیں کیا۔

سائمن کیرر اور والٹر نونز نے جمعے کے روز اسلام آباد میں ایک نیوز کانفرنس سے خطاب کرتے ہوئے کہا  کہ وہ دوبارہ پاکستان ضرور آئیں گے اور اپنا ادھورا مشن پورا کریں گے۔

دونوں کوہ پیما نانگا پربت کو سر کرتے ہوئے 16جولائی کو سات ہزار میٹر بلندی پر پھنس گئے تھے۔ جب کہ اسی دوران ان کا تیسرا ساتھی اور ٹیم کا سربراہ گر کر ہلاک ہو گیا تھا۔

اطالوی کوہ پیماوٴں کا کہنا تھا کہ انہوں نے اپنے مرحوم  ساتھی  کے ساتھ ایک مشن کا آغاز کیا تھا۔لیکن ان کی موت نے اسے ایک عظیم سانحے میں تبدیل کر دیا۔ان کا کہنا تھا کہ کارل مرتے وقت انہیں مدد کے لیے پکارتا رہا۔لیکن وہ خود اس طرح پھنسے ہوئے تھے کہ اس کی مدد کو نہیں پہنچ سکے۔