افغانستان کے صوبے خوست میں امریکی فوجی

افغانستان میں نیٹو  کے تین فوجی سڑک  پر نصب بم کے  دھماکے میں ہلاک  ہوگئے ہیں۔ یہ اسلامی باغیوں کی جانب سے حملوں کے بڑھتے ہوئے سلسلے میں ہونے والی تازہ ترین ہلاکتیں ہیں۔

عہدے داروں نے کہا ہے کہ یہ فوجی بدھ کے روز مشرقی افغانستان کے علاقے غزنی میں ہلاک ہوئے۔ افغان وزارت دفاع نے انہیں پولینڈ کے فوجیوں کے طورپر شناخت کیا ہے۔اس دھماکے میں  ایک فوجی زخمی بھی ہوا ہے۔

اس دھماکے سے چند روز قبل کابل کے مشرق میں مشتبہ طالبان کے ساتھ لڑائی میں دس فرانسیسی فوجی ہلاک ہوگئے تھے۔ 2001ءمیں طالبان کی حکومت کے خاتمے کے بعد سے کسی ایک حملے میں  یہ غیرملکی فوجیوں کی ہلاکتوں کی سب سے بڑی تعداد تھی۔

اسی دوران اتحادی اور افغان فورسز نے مشرقی صوبے لغمان میں ایک کارروائی کے دوران 30 سے زیادہ عسکریت پسندوں کو ہلاک کردیا۔ اتحادی اور افغان فوجی اس وقت جدید دھماکا خیز ہتھیاروں کی تلاش میں کارروائی کررہی تھیں جب وہ  فائرنگ کی زد میں آئے۔