ترک پولیس کے عہدے داروں نے کہا ہے کہ مغربی شہر ازمیر میں ایک کار بم دھماکے میں کم ازکم 13 افراد زخمی ہوگئے ہیں جن میں زیادہ تر پولیس اہل کار ہیں۔

عہدے داروں کا کہنا ہے کہ یہ دھماکا جمعرات کی صبح پولیس  اور فوجیوں کو لے جانے والی گاڑیوں کے قریب ہوا۔ ٹیلی وژن کی فوٹیج میں دھماکے کی جگہ پر موجود تباہ شدہ کار سے گہرا دھوان اٹھتا ہوا دکھایا گیا۔

زخمی ہونے والوں میں سات پولیس اہل کار،تین فوجی اورتین عام شہری شامل ہیں۔

اناطولیہ نیوز ایجنسی نے ازمیر کے گورنر کاہت کیراک کے حوالے سے کہا ہے کہ دھماکا پلاسٹک بم سے ہوا جسے ریموٹ کنٹرول سے چلایا گیا تھا۔

کسی نے اس حملے کی ذمے داری قبول نہیں کی ہے مگر ترک عہدے داروں کو کردباغیو ں پر شبہ ہے۔

اس دھماکے سے دو روز قبل ترکی کے جنوبی صوبے مرسین میں ایک مشتبہ خودکش بمبار کے حملے میں کم ازکم نو پولیس اہل کار زخمی ہوگئے تھے۔