جمعرات کے دن کوہاٹ میں فوج کے ایک میجر محمد ایوب کو نا معلوم عسکریت پسندوں نے اُس وقت گولی ماردی جب وہ گھر سے دفتر جا رہے تھے۔

فائرنگ کے نتیجے میں میجر ایوب شدید زخمی ہوئےاور اُن کو اسپتال پہنچا دیا گیا، تاہم وہ زخموں کی تاب نہ لاکر اسپتال ہی میں چل بسے۔  میجر ایوب کا تعلق پنجاب رجمنٹ سے بتایا جاتا ہے۔

ابھی تک کسی فرد یا تنطیم نے اِس حملے کی ذمے داری قبول نہیں کی ہے۔

اُدھر سوات میں یونین کونسل ننگولائی کے سابق ناظم اور اُن کے تین ساتھیوں کو نامعلوم عسکریت پسندوں نے ڈیرائی گاؤں میں گولیاں مار کر ہلاک کر دیا جب کہ طالبان جنگجوؤں نے ایک شخص اسلام گل کو سیکیورٹی فورسز کے ساتھ مدد اور مخبری کرنے کے الزام میں گولی مار کر ہلاک کردیا۔

خیال رہے کہ تشدد کے یہ واقعات ایک ایسے وقت ہو رہے ہیں جب باجوڑ ایجنسی میں طالبان کے خلاف فوجی آپریشن کے ردِ عمل میں طالبان جنگ جوؤں کے رہنما ملک بھر میں سرکاری املاک، افسروں اور دیگر لوگوں پر حملے کرنے کی دھمکیاں دے رہے ہیں۔