فلپائن کے فوجی عہدے داروں نے کہا ہے کہ امریکی بحریہ کے ایک جہاز نے اس ٹرانسپورٹ طیارے کا کھوج لگا لیا ہے جو پچھلے مہینے جنوبی جزیرے منداناؤ سے پرواز کے بعد حادثے کی نذر ہوگیا تھا ۔ اس حادثے میں عملے کے تمام نو ارکان ہلا ک ہوگئے تھے۔

عہدے داروں  نے کہا ہے کہ امریکہ کے ایک سروے جہاز  یوایس این ایس جان مک ڈونل نے فلپائن کے فوجی طیارے  کا ملبہ دو روز کی تلاش کے بعد جمعرات کی رات  ڈھونڈ لیا۔

طیارے کا ملبہ جزیرے منداناؤ  کے جنوبی شہر  داواؤ کی ساحل کے قریب سمندر میں 130 میٹر کی گہرائی سے ملا۔

سی ون تھرٹی ٹرانسپورٹ طیارہ25 اگست کو  اس وقت حادثے کا شکار ہوگیا تھا جب وہ صدر کے سیکیورٹی گروپ کے افراد کو لینے  وسطی الوئی لو شہر کی طرف جارہا تھا۔ اس وقت طیارے پر دو پائلٹوں سمیت عملے کے نو ارکان سوار تھے۔

حادثے کی وجہ ابھی تک معلوم نہیں ہوسکی ہے۔