ری پبلیکن پارٹی کے کنونشن کے موقع پر  مظاہرین

امریکی ریاست منی سوٹا کے شہر سینٹ پال میں جمعرات کے روز پولیس نے کم ازکم دو سو مظاہرین کو  اس وقت گرفتار کر لیا جب انہوں نے اس مقام کی جانب بڑھنے کی کوشش کی جہاں ری پبلیکن پارٹی کا قومی کنونشن ہورہا تھا۔

کم ازکم ایک ہزار مظاہرین نے ری پبلیکن پارٹی کے کنونشن کے آخری دن جلوس نکالا۔ تاہم جب وہ اس مرکز کے قریب پہنچے جہاں ری پبلیکن پارٹی کا کنونشن ہورہا تھا تو پولیس نے ان کا راستہ روک دیا۔

موقع پر موجود وی او اے کے ایک نامہ نگار کا کہنا ہے کہ مظاہرین عراق جنگ اور دوسرے مسائل پر احتجاج کے لیے جمع ہوئے تھے۔ نامہ نگار کا کہنا ہے کہ پولیس نے مجمع سے منتشر ہونے کے لیے کہا مگر مظاہرین نے انکار کردیا۔

حکام کا کہنا ہے کہ چار روزہ کنونشن کے دوران سینکڑوں مظاہرین کو گرفتار کیا گیا ہے۔ ان میں سے اکثر کی گرفتاری پیر کے روز  اس وقت ہوئی تھی جب وہ  تشدد پر اتر آئے تھے۔