زیمبیا کی حکمران جماعت کا صدارتی امیدوار چننے کے لیے اجلاس
September 5, 2008
زیمبیا کی حکمران جماعت ایسے امیدوار کے انتخاب کے لیے جمعے کے روز اجلاس کررہی ہے جو صدر لیوی موانا واسا کے انتقال کے باعث خالی ہونے والے صدارتی عہدے کے لیے الیکشن میں حصہ لے گا۔
موومنٹ فار ملٹی پارٹی فار ڈیموکریسی کی جانب سے نائب صدر روپیا بندا اور وزیر خزانہ نگاندو مگاندے دو اہم امیدوار سمجھے جارہے ہیں۔
پارٹی کایہ اجلاس آنجہانی مواناواسا کو دارالحکومت لوساکا میں سپرد خاک کیے جانے کے دو روز بعد ہورہاہے۔
جمعرات کے روز زیمبیا کے سرکاری ٹیلی وژن نے2005ء میں ریکارڈ کیا جانے والاقوم کے نام آنجہانی صدر کا ایک پیغام براڈ کاسٹ کیا۔
اپنے اس پیغام میں آنجہانی صدر نے کہا تھا کہ انہوں نے مقامی اور غیر ملکی سرمایہ کاری کی حوصلہ افزائی کے ذریعے قوم کا معیار زندگی بہتر بنانے کی کوشش کی ہے۔ انہوں نے مستقبل کی حکومتوں پر زور دیا کہ وہ بدعنوانی کے خلاف جدوجہد جاری رکھیں۔
آنجہانی صدر نے اس بارے میں کچھ نہیں کہاتھا کہ وہ کسے اپنا جانشین بنانا چاہتے تھے۔
اس صفحے کو ای میل کیجیے
قابل چھپائی صفحہ
