میک کین سینٹ پال میں

امریکہ کی ری پبلیکن پارٹی کے نامزد صدارتی امیدوار سینیٹر جان میک کین جمعے کےروز وسکانسن، مشی گن اور کولوراڈو سے انتخابی مہم شروع کررہے ہیں۔

سینیٹر میک کین نے ریاست منی سوٹا کے شہر سینٹ پال میں اپنی پارٹی کے قومی کونشن کے آخری دن جمعرات کے روز پارٹی کی جانب سے نامزدگی کو باقاعدہ طور پر قبول کیا۔انہوں نے کہا کہ اگر وہ منتخب ہوگئے تو بقول ان کے وہ اور ان کی نائب صدارت کی ساتھی الاسکا کی گورنر سیرا پیلن زیادہ اخراجات کرنا، ملک کے لیے کچھ نہ کرنا، اپنی ذات کو ملک پر اہمیت دینے کے پرانے رویوں کو بدل دیں گے۔

ایری زونا کے قانون ساز اور سابق فوجی میک کین نے ڈیموکریٹس  کے ساتھ اپنے کام کے ریکارڈ کا ذکرکیا اور یہ وعدہ کیا کہ وہ صدر کی حیثیت سے دونوں پارٹیوں کو ساتھ لے کر چلیں گے۔

سینیٹر جان میک کین نے کہا کہ انہیں اپنے مخالف ڈیموکریٹک صدارتی امیدواربراک اوباما سے بڑے اختلافات ہیں۔ انہوں نے کہا کہ وہ اوباما کی عزت اور احترام کرتے ہیں مگر انہوں نے خبردار کیا کہ وہ ٹیکس بڑھا دیں گے اور حکومتی اخراجات میں اضافہ کردیں گے۔

سینیٹر اوباما کی صدارتی مہم کی جانب سے جاری ہونے والے ایک بیان میں کہا گیا ہے کہ جان میک کین شاید یہ بھول گئے ہیں ایری زونا کے یہ سینیٹر لگ بھگ 30 سال تک’ کچھ نہ کرنے والے اس گروہ‘ کا حصہ رہے ہیں۔