چین کے صدر ہو جنتاؤ ( دائیں ) اور ایرانی صدر محمود احمدی نژاد

چین کے صدر ہو جنتاؤ نے کہا ہے کہ ایران کے ایٹمی مسئلے کے بارے میں عالمی طاقتوں کو لچک کا مظاہرہ کرتے ہوئے اس کا حل تلاش کرنا چاہیے۔

ایرانی صدر محموداحمدی نژاد نے ہفتے کے روز بیجنگ میں چین کے صدر ہوجنتاؤ سے ملاقات کی ہے ۔
صدر احمدی نژاد بیجنگ پیرا لمپکس کی افتتاحی تقریب میں شرکت اور ایرانی کھلاڑیوں سے ملاقات کے لیے ایک روز دورے پر بیجنگ گئے تھے۔

چین کے صدر  نے 12 مئی کوجنوب مغربی چین میں آنے والے زلزلے کے بعد، جس میں 80 ہزار سے زیادہ افراد ہلاک ہوگئے تھے، تہران کی امداد  اور معاونت کا شکریہ ادا کیا۔

چین ،امریکہ ، برطانیہ ،فرانس ، جرمنی اور روس کے ساتھ ان مذاکرات میں شامل ہے جن کا مقصد ایران پریورینیم کی افزودگی کا پروگرام روکنے کے لیے دباؤ ڈالنا ہے۔

مغربی ممالک یہ الزام عائد کرتے ہیں کہ ایران جوہری ہتھیاروں کی تیاری کے لیے کام کررہا ہے جبکہ ایران کا کہنا ہے کہ اس کا پروگرام پرامن مقاصد کے لیے ہے۔

چین کے سرکاری خبررساں ادارے زن ہوا نے کہا ہے کہ صدر احمد نژاد نے صدر ہو کو بیجنگ اولمپکس کے کامیاب انعقاد پر مبارک باد پیش کی۔