انگولا کے سرکاری میڈیا نے کہا ہے کہ پارلیمانی انتخابات میں تاخیر کے نتیجے میں جمعے کے روز بہت سے ووٹروں کے ووٹ نہ ڈال سکنے کی بنا پر  ہفتے کے روز دوسرے دن دوبارہ ووٹنگ شروع ہوئی ۔

ہفتے کے روز دارلحکومت لوانڈا میں پولنگ اسٹیشن دوبارہ کھولے گئے جہاں بہت سے پولنگ اسٹیشنوں میں جمعے کے روز سامان اور انتخابی مواد نہیں پہنچ سکا تھا۔

حزب اختلاف کی سب سے اہم جماعت یونیتا نے انگولا کی آئینی عدالت سے درخواست کی تھی کہ لوانڈا میں ووٹ ڈالنے کی اجازت دی جائے۔

یونیتا کے راہنما عیسا عیسا سماکووا نے کہا ہے کہ جمعے کے روز انتخابی نظام عملی طور پر مفلوج ہوگیا تھا اور انہوں نے لواندا میں ووٹنگ دوبارہ کرانے کا مطالبہ کیا ہے۔

حزب اختلاف کی کئی چھوٹی جماعتوں نے بھی کہا ہے کہ وہ نئے انتخابات چاہتے ہیں۔

انگولا میں جب سے ایک طویل خانہ جنگی کا خاتمہ ہوا ہے، 16 سال میں یہ پہلے قومی انتخابات ہیں۔

نتائج اگلے ہفتے متوقع ہیں۔