پاکستان کرکٹ بورڈ(PCB)کو نہ صرف کرکٹ مقابلوں کے انعقاد میں مسائل کا سامنا ہے بلکہ بور ڈ کے چیئر مین کا عہدہ خالی ہونے کی وجہ سے اسے نت نئے آئینی مسائل سے بھی دوچار ہونا پڑرہا ہے۔ دو روز قبل پی سی بی کی انٹرنیشنل کرکٹ افیئرز کمیٹی کے صدر علی رضا نے اعلان کیا تھا کہ پی سی بی کو درپیش مسائل کے حل پر گفتگو کے لیے 13ستمبر کو گورننگ بورڈ کا اجلاس میں لاہور میں ہوگا ۔

تاہم وفاقی وزارت کھیل نے تنبیہ کی ہے کہ چیئرمین پی سی بی کی عدم موجودگی میں گورننگ بورڈ کا اجلاس اور اس میں کئے گئے فیصلے غیر قانونی اور غیر آئینی ہوں گے۔ اس بارے میں پی سی بی کے عہدیدار شفقت نغمی نے وائس آف امریکہ سے بات کرتے ہوئے دبے الفاظ میں اس بات کا اقرار کیا کہ پاکستان کرکٹ بورڈ کے آئین کے تحت گورننگ بورڈ کا اجلاس یا تو چیئرمین طلب کرسکتا ہے یا پھر اجلاس بلانے کے لیے بورڈ کے دوتہائی اراکین چیئر مین سے درخواست کرسکتے ہیں۔

اس صورتحال سے وفاقی وزارت کھیل کا یہ مئوقف درست ثابت ہوگیا ہے کہ پی سی بی کے چیئر مین کی تقرری تک گورننگ بورڈ کا اجلاس منعقد نہیں ہوسکتا۔