پاکستان کرکٹ ٹیم کے آسٹریلین کوچ جیف لاسن نے کہا ہے کہ اگر نئے پی سی بی چیرمین کی تقرری کے بعد ان کی ضرورت محسوس نہ کی گئی تو وہ کوچنگ چھوڑ کر وطن واپس جانے کے لیے تیار ہیں۔

توقع کی جار رہی ہے کہ آصف زرداری کی طرف سے صدر کا حلف اٹھانے کے بعد وہ کرکٹ بورڈ کے سرپرستِ اعلیٰ کی حیثیت سے بورڈ کے نئے چیرمین کا تقرر کریں گے۔ واضح رہے کہ جیف لاسن کی کوچنگ میں پاکستانی کرکٹ ٹیم ابھی تک کوئی قابلِ ذکر کامیابی حاصل نہیں کر پائی، جس کی وجہ سے ان کو شدید تنقید کا سامنا ہے۔

جیف لاسن نے کہا کہ آسٹریلیا میں ان کے پاس کوچنگ کی کئی پیش کشیں موجود ہیں اور اگر پی سی بی نے ان کی ضرورت محسوس نہیں کی تو انھیں کوئی پریشانی نہیں ہو گی۔